Home / News / Manuel da Luz Goncalves: Nu kre rekomenda nhos tudu pa kunpra un kópia di “Recordar é Viver”

Manuel da Luz Goncalves: Nu kre rekomenda nhos tudu pa kunpra un kópia di “Recordar é Viver”


Recordar é Viver: Livru di Carlos Tavares

Tudu es títulu di es livru, Recordar é Viver, e, en parti, baziadu na létra di múzika “Recordar é Viver” di Victor Esparadinha. Aliás, foi un skódja ki, di prinsípiu pa fin di es livru, ta leba-nu tudu kenha ki lé ô bai lé es livru, rekorda nos própi mimória di pasadu ku sabura y frustrasons, di amor y dizamor… Skant, nominhu di kaza di Carlos Tavares na fazi infantil y juvenile, ta vive un vida xei di amargura, primeru, pamódi e ka konvive, pa txeu tenpu, ku se pai, di pértu. Nu sabe ma se pai podu na prizon, la na ilhas di Bijagós, na Giné-Bisau, pa ajentis koloniais (PIDE) pa txeu tenpu, y se mai parti di es mundu tan sedu ki Skant, infilismenti fika sen kel amor di mai sima tudu mininu filis ta vive y kria.

 

Nes periudu di infansia, entri Alto Solarine y Txan di Likrin, Skant, mininu trakinu ma kunpridor di valoris duméstiku, vive, dipos di morti di se mai, kun tia “Tanha” ki faze dever di mai ki kria-l na pobreza ma ku dignidadi di mininu ki ta brinka na rua ku kulégas ma ruspetador y konsienti di se direitu di kriansa y pesoa, sen medu di faze pergunta pa prufesor y gentis grandi.

 

Nes perkursu di autor, di pasajen di skóla primária pa sekundária, Skant prende txeu y skuta kanpanha ki prufesoris ta fazeba kontra Amilcar Cabral, y kel-li, poi ta pokenta-l dimás ki el kumesa ta kuestiona pamódi txuma Cabral di terrurista? Y Americo Tomaz? Gentis persebe di es atitudi di Skant y, anton, es kumesa ta afronta-l psikulójikamenti ku ameasas ma e ka podeba kontinua skóla pamódi idadi. Di fatu, Skant, purfin, kaba pa larga skóla y el kumesa ta trabadja.

 

Na Txan di Likrin, Skant, líder natu, kumesa ta kria grupus di disportu y múzika ki poi Txan di Likrin na top di kes otus bairru di Sanvisenti pamódi ses fama di bons atletas y bons múzikus. Nes interrason di konvívius muzikal y disportivu, Skant ganha sinpatias y konvive ku gentis di skalon muzikal sima Cesaria Evora y otus ki sirbi-l di izénplu pa kontinua ku banda muzikal y grupu disportivu.

 

Mindelo, sidadi y Sanvisenti, ilha ki odja mininu Skant nanse, é palku di akontesimentus ki marka vivensia di autor, desdi jogu di bola na antiga sélibri praia di Matiota, na noti di konvívius y bebederas, na ranja pikénas ma tanbe na kre toma vida ku más seriadadi na buska di un trabadju midjor…

 

Na vida y na buska pa midjor senpri ta parse kontratenpus y kontrastis y Carlos ka fuji di es inpasi, pelu kontráriu, ku se spritu perspikás di un líder, el kontinua ta dumina se personalidadi y ultrapasa barreras. Mininu ku gana ba skóla ka dixadu kumesa ta trabadja y faze un bon saláriu. Infilismenti, dinheru foi tentason y leba Skant pa bebederas y boémia. Na es kazus, ta ten un luta entri ben y mal. Pa ben di Skant, na óra sértu, parse algen di bondadi, un grandi mentor, Manuel Inocencio, ki pega y finka pé na txon pa labanta Carlos di lama.

 

Es livru ta ritrata diferentis fazi di vida ki Carlos ta inkarna na personalidadi di ómi di oji. Sima ki Skant bai ta bira grandi, se spritu di diskontenti ku situason di ser kabuverdianu subjugadu só bira livri ku revoluson di 25 di Abril (1974) ki disperta se interesi y konprende ki, afinal, Kabral ka éra terrorista… motins di rivólta kumesa ta surji y Sanvisenti – Ribera Boti y Mindelo – foi fulkru di akata revoluson pa korre ku tugas y ses lakaius. Sanvisentinus inkluindu Skant konsigi korre ku tropa y toma radio barlavento.

 

Foi asin ki Carlos santa na tropa y sirbi tropa ku amor pa dizenvolvimentu di Kabuverdi pós indipendensia y toma vantaji di selera ses kunhesimentus kun kursu na Kuba.

 

Na bai ku ben, Carlos pensa ma vida di solteru e ka pa senpri, nun viaji di atividadi muzikal pa Santanton, autor paxona pa un kriola ki fasxina-l y e jura-l ma el ta lebaba el pa altar. Konkistas y más konkistas e konsigi pudera di amor di se vida, enbora sen apoiu di pai, ki más tardi, autor ben diskubri ki propi pai kumeteba un insestu ku se fidja di 3 anu na Angola. Dulce, nomi di es linda kriola di ilha di montanha, prokria dos fidju, un matxu un fémia ki kativa korason di Carlos y faze-l más lutador pa ki pon di kada dia ka faltaba na kaza di se amada.

 

Di Santanton pa Sanvisenti, di Sanvisenti pa ilha di Santiagu, es familia luta pa ben estar di ses fidju, y, difatu, na tudu pasa mal, es da ses reviravolta ti konsigi ranja un lar midjor tantu na Praia komu na Sanvisenti pa kalenta y kria fidjus ki el, Carlos, ka tevi sorti na se infansia…

 

Spriensia di Carlos nas ilhas tevi se kontrastis forti kuandu el sirbi tropa na Somada y Pedra Badeju. Kel mosin di Sanvisenti reintegra na interior di Santiagu y konvive ku jenti umildi di kanpu reafirmandu se kabuverdianidadi na luta di emansipason kultural. Karnaval di Sanvisenti, batuku y tabanka di Santiagu simenta-l na alma y ilumina-l se kriolidadi di ser kabuverdianu, afrikanu y sidadon di mundu… si tudu kabuverdianu podeba ten es priviléjiu di konxe Kabuverdi, di Djabraba pa Santanton, anton Kabuverdi ta serba más unidu na se diversidaddi linguistiku y kultural.

 

Nu sabe ma autor utiliza un linguajen na Purtuges sinplis, ka izajeradu, ma nu ta prizensia mumentus ki é prisizu dizabafa na Kriolu undi situasons ta pirmiti kaba ku afrónta, anton, bu ta dizafronta na Kriolu atraves di piada, rafodju, dizafor, pruvérbius y frazis típiku di varianti di kada ilha. Aliás, tudu skritor kabuverdianu ta utiliza es kapasidadi kriativu di lingua kriolu pa poi na bóka di personajens rialidadi di téra. Nu odja, pur izenplu, kuandu autor ta dizafia y kontraria izersitu purtuges kul kel ditadu “pedra ka ta jega ma garrafa” undi na Ribera Boti, frontadu, povu sai na rua y rizisti tropa. Kuandu autor, na viaji di Pedra Badeju pa Djer-Mai nun faluxu, odja séu bira mar el matuta “ ja bo kaí na mar, agora nadá”, o, anton, kuandu ta konkista Dulce undi kriola bunita responde-l “rapás di Sonsente sen pekéna? Ka bo faze-m ri, bo ta na goze, né!” Sima N fla, es puder kriativu é móda un pinsel na téla…

 

Es livru, purtantu, sta divididu pa kapítulus y tudu el sta diskrebedu na 34 kapítulu, kada un ku se tema principal. El ta kumesa ku infansia y juventudi di Skant pa termina ku ilojius y kontra ilujius di figuras pulítiku na un Kabuverdi pós indipendensia y konkretizason di demokrasia na se stadu di direitu demokrátiku.

Nu tenta, anton, djobe alguns atitudis y atributus ki autor ta da-nu komu izenplu di riflekson na óras ingratas y konxe más es ómi dinámiku y umanista. Insertezas di imigrason, di ilegalidadi pa legalidadi, trabadju duru y poku saláriu pa manda pa téra y djanbrabi limé ta faze di Carlos un pesoa ki sufre, sakrifika y vense pa dipos toma rédia na diferenti frentis asosiativus pa lidera y djuda kes más nesesitadu. Anus di trabadju voluntáriu na CACD y otus grupus ta dimonstra kapasidadi umanista di autor na rezoluson di prublemas social. Spriensia di ilha di Santiagu fika na alma di autor y, un di kes mumentus más inportanti na imigrason foi enkontru di autor ku Norberto Tavares pa ser se doador di un rin. Na es interason, Carlos ku familia di Norberto vense fronteras y autor bira un ídolu tantu di mai y familia di Norberto komu di familia di autor, Kabuverdi y komunidadi imigranti enjeral. Ku es atu nobri, Norberto konsigi vive pa uns mezis, y. oji, nundi k’el sta, é un vos di speransa, un vos di Kabuverdi di speransa transfiridu na umanismu y kabuverdianidadi di Carlos Tavares.

 

Stória di Carlos linhabadu nes livru ka ten nada di fikson, purtantu e ka un romansi. É un stória di spriensia vividu ku dor y sodadi, ku sakrifísiu y susésu. Nu entantu, disaboris ka falta y tudu ben kulmina ku pididu di divorsiu, di amor di se vida, sen sabe motivu. Kel-li lasera-l se korason pa senpri. Stória di es livru ta ronda sobri propi autor na ses mumentus sabi, mumentus kasabi, kontrastis di pensamentu y imosons ki ta po-nu viaja na pasadu, prizenti y futuru tantu na Kabuverdi komu na diaspora pa nu kumuga un padasin di se vida. Pa nu konprende midjor es relason di karater di autor nu meste lé es livru y refleti nos stória, nos pulítika y faze di nos kabesa, pensadoris undi pensamentu krítiku y razon ta ser nos kauza di izistensia.

 

Es livru é un atu eroiku di un eroi ki ka sabe ma el é eroi, ma povu ki ta fla y manifestasons di solidariedadi sta stanpadu na fotografias di livru ki bale más ki palavras. Kes kondekorasons y omenajens tantu di Governu di Kabuverdi komu di entitadis pulítikus, asosiasons y klubis é un dádiva di ruspetu y rekunhesimentu ki autor di “Recordar é Viver” ben merese.

 

Pa N konklui, N kre fla ma mensaji ki autor ta dexa pa nos Kabuverdi é pa ten más studus sobri pedofilia (Santanton y Djarfogu). Universidadis dja nu ten. Nu meste dibrusa sobri prublemas antroplójiku kabuverdianu y faze di nos studantis peskizadoris y investigadoris ku kréditu internasional.

 

Nu kre rekomenda nhos tudu pa kunpra un kópia di “Recordar é Viver” pa djuda-nu rekorda nos própi storia ki bale pena konta. Nos tudu nu djunta mon pa nu da un salva di palmas pa nos autor y amigo Carlos Tavares.

 

Manuel da Luz Goncalves

05/28/17

 

 

Facebook Comments
Download PDF
Google+
%d bloggers like this: